Ned normol
wenn i frieh vurm spiegl steh
und der do drinna glotzd mi oh
und iech ferchd mi vur mier selber
und wenn grod kanns herschaud soochi
obachd däss dei glotzer fei ned stehblabbd
und iech drehnern a nosn hie
und wenn grod kanns herschaud dann steck iech
af der kickerdabelln am kühlschrank
di bayern hindn hie
und wenn grod kanns herschaud fohri baucherdi
midn schliedn in berch no
und iech bredder nei in grohm
und wenn i spazierngeh nachn rehng
und di sunna spitzd grod vur
und di ärdn riechd nach ärdn
und wenn grod kanns herschaud nehmi onlauf
und iech mach an drimmer hupfer
in di gressde pfitzn nei
des is doch ned normol
wenn aaner ganz normol is
es is doch viel normoler
wenn aaner ned normol is
des is doch ganz normol ganz normol ganz normol
und wenn i spazier im frischn schnee
unberührd und kaane spurn
bloß am himml a boär kratzer
dann schauermi um und wenni allaa bin
schiffi konzendrierd
a groß W nei in schnee
© 2006 wolfgang buck
